الى كل من عاش بقلب عراقي , نداء من أُم

195
الى كل من عاش بقلب عراقي
نداء من أُم
سمية العبيدي

 

هذا مو فسيفساء
لو فهمنا الالفباء
شعبنا ماخذ رطوية
قسم حال وقسم لاء
هذا مو فسيفساء
وقسم كشر نزع جلدة
وقسم راح وقسم جاء
هذا مو فسيفساء
حرامات الدهر جار
وين صفا ذاك الجدار
النباهي الدنية بيه
وكالطفل وقت السلم … حب ودلال
وكله شد حزام لو حق القتال
وين هج ذاك الجدار
كان احمد أخو اوميد
وعمر وحسين بالدبكة يركصون
وسمية وفاطمة وام آواز لتسواهن يغنون
والعرس
ليل ونهار
وين هج ذاك الجدار
لما سلمى تروح بيت جارتها تداريها
بنفاس و وجع … ولو بردت تغطيها
وبيت الجار حرمة
وكلنا نقسم اللكمة
لو وكع عباس
وسال دمه للركب
وامه غابت روحها
وما تكدر تدريه
ام عثمان هبت بعطابة
خلت الطفل بحضنها
وداوت صوابه
وقرت سورة على راسه تهديه
شرّبت امه ورد ماوي
وين هج ذاك الجدار
صار لكمة بحلج واوي
احذروا ولموا الشمل
وانسوا الصغيرة
تره ذيج الاخت
ما تدرون منهو اللي يجرجرها من الضفيرة
لموا دمنا لا يسيح
خل حربكم ويه اهلكم باللسان
ديجنا هدار وفصيح
وخل حربكم وي عدوكم بالحسام
هلوطن لمة حبايب
طفل حرمة شاب شايب
ابيض احمر كلنا اخوة
وللوطن انروح فدوة

سمية العبيدي
بغداد في 1/5/ 2021

14:59:00

 

اترك رد

لن يتم نشر عنوان بريدك الإلكتروني.

آخر المواضيع